Phili 2 | WSK | STEP | Nina Kristus nengemang ningi se umutang sokel ningarso. Nu ninga kueso ale nengemang lila awuso. Se Korang Bur nina nengerak se, nina ninimi nengemang tua yawarakala, se ninimi saonga yawarakala.

Philippians 2

Ana nainimi ira kutuwunak ale baganakko

1 Nina Kristus nengemang ningi se umutang sokel ningarso. Nu ninga kueso ale nengemang lila awuso. Se Korang Bur nina nengerak se, nina ninimi nengemang tua yawarakala, se ninimi saonga yawarakala. 2 Buta se, nina ikia nengemang suwanta baga se, ninimi ninguru ko kueralko, mu te aninga angamang amilmil biyala tairukko.

3 Ninimi nemeke kiara ko me karogo kaeralko. Ale nengeta ninip me patowaralko. Mena. Nina ninimi ira kutuwural ale saki alo nunga nunup patowaralko. 4 Ale ninga saki nunga yawarakala sinar talko, nengeta ninimi ko la mena.

5 Ninga ikia, ninga nengemang mu Jesus ko iwitatala anirukko. Jesus bitakaso iwitata nina beteralko:

6 “Nu Kaem,
bare nu Kaem iwita nup biya kualala sokel ago bagurukko iwita me ikikaso. Mena.
7 Nu numi ira kutuwuram, ale kari ko aratam,
ale ura dungan kari yam iwita bagakaso.
8 Nu kariimet nunga turan;
ale numi ira kutuwuram ale Kaem kuring karo tuam
eng nama tam kangono te kueram.
9 Umutang ko, Kaem nu patowaram ale kuwim kualala biya mu tuam,
ale nup biya nunguningkiri, nup suen la nunga kiaram, mu tuam.
10 Se Jesus nup te kariimet duruk te,
aliti imi te, ali bowa ko, mu suen la nubugura kulukurmon
11 ale balmon, “Jesus Kristus mu Kari Biya,” mamon,
se Ba Kaem ko nup kualala biya anirukkowo. ^{▼▼Phil 2:6-11 Jesus mu Kari Biya: Isaiah 45:21-23 se Rom 14:11-12 ago arikko. Jesus, Kaem ko Namar: John 1:1-2; 17:3-5; 2 Cor 4:4; Col 1:15; Heb 1:3. Nu numi ira kutuwuram: 2 Cor 8:9. Nu nup biya tam: Heb 12:2.}

Ana baras iwita kani se baganakko

12 Buta se, aga singsang yawara, tom ani nina nengerak bagakasam se agiring karokasan iwitatala, aitak ani awar bagasam imi te agiring ninguru kaoralko. Kaem ninga giam mu ko nguanga se, ko bowa ningi baga se, munan ningo nina te yawarakala bagaralko mu la bita se bagaralko. 13 Mu awuk, Kaem kota ninga ningi baga se ninga sangaruwoso, nina noko ikia gomang karo tualko kueral, ale ko ikia gomang karo tualko terong malko, se umutang ko nu ninga ningi ura iluwoso.

14 Mel suen biya beteralko mu den bala ngual ngual tagira gurugumura mena, ining singi mena te beteralko. 15 Mu te nina memek bo mena, yawarakala Kaem ko kuriang nunguning bagaralko. Ale ali tiromorom ago imi te, kariimet nunga ikia aora biya, nunga betera kaora memek, mu nunga ningi baga se, Kaem ko den marak sokel ago mu nunga manaru se, baras taiti gomang te kanisan iwitatala, nikim kapa se bagaralko. ^{▼▼Phil 2:15-16 Daniel 12:3 ago arikko.} Nina butata beteral mu, ani Kristus tairukko tom te nina nego ko amilmilirikko terong mam. Mu awuk, aninga ura kowar ipi me namaram. 17 Nina Kristus ko nengemang ningi nunguning aram se ko ura ilu se ikup gisan, mu Kaem tama bita tua iwitata. Se ani ko den balsam mu ko aga momon se kuerik mu terong, mu ani nengerak tama bita tusan iwitatala. Ani amilmilirikko, ale nina suen la nengerak amilmilirikko. 18 Se nina betelatala am amilmilaral, ale agarak amilmilaralko.

Timothy ko den

19 Kari Biya Jesus ko gomang buta aniruk mu, ani Timothy tairate bitirik se nengete namurukko. Ale peleruk tairuk ale nenenga dugu duap aga manuk se angamang kutek maukko. 20 Kari bo imi te noko turan ani agarak mena, nu kota suwanta ko ikia aninga ikia turantala, se nunguningta ninga kueso ale ninga sangukko ikia moa lagoso. 21 Kari suen la nongota nunumi ko la sinar tasan, ale Jesus Kristus ko ura ko me sinar tasan. 22 Bare Timothy mu kari ningo mu nina ko ikisan. Nu kuriang ko nuet ura te sangarso iwitatala, nu ani den gilalong yawara ko ura te aga sangarukaso. 23 Se ani nuna aga betemon se aratik agi, mena agi mu ko ikiek, mu aninga angamang nu tairate bitirik se nengete namurukko. 24 Se ani Kari Biya ko angamang ningi nunguning, nu lage nungok se ani betela tairatela nengete namirikko.

Epaphroditus ko den

25 Ulengkala nina Epaphroditus beteman se agate tairam aga sangarukaso. Nu aninga bo se aninga ura suwan, ani nu ilak den gilalong yawara ko sail tagikasan. Bare aking bitirik se nengete peleruk namurukko ikiem. 26 Mu awuk, nu nina suen la ningarkukko ko gomang biyala niaso. Nu kuera ago bagakaso wore ko den nina ikiman, se nu ikiam ale ningarkukko ko gomang batagawoso. 27 Ulengkala nu kuera tam ale kuerukko tom pingi aram. Bare Kaem gomang tuam se nungeram. Se nu la mena, ani agotala gomang aisam, mu awuk, nu kueruk se ani ikup bo agotala aga irok bore ko.

28 Nina noko ningamin yenakaso, se aninga angamang biyala nengete bitirik se namuruk se arigal ale aking amilmilaralko. Se ani agata aga angamang bataga mu agotala menarukko. 29 Tom nu nama aratuk mu, nina Kari Biya nup te amilmil ago la nu talko. Kari uwuta mu nunup patowaralko. 30 Mu awuk, nina awar biya se aninga saongalko me terong, se nu tairam ale aninga sangarukaso, ale Kristus ko ura te kuerukko tom pingi aram.